Abteilungsleitung
D'Pfadilüüt känned mich als Styra oder oftmals nänneds mich au eifach nur Sty. Mini Pfadilaufbahn hät erscht i de 6. Klass agfange. Aber sit deet häts mich packt und ich chume nüme los devo. G'leited hani für 5 Jahr bis im Summer '06 im Trupp Habsburg.
Nach ere churze Pfadipause hani mit andere zäme d'Fünkli Hotzeplotz in Elsau uf d'Bei gstellt. Sit em Summer '07 bin ich jetzt det begeischtered am leite. Es Jahr später hani zäme mit de Miaja und de Zarpa au na s'AL-Amt überno. Usserdem engagier ich mich immer wider für s'eint oder s'ander Projektli i de Pfadiregion Winti. I de Pfadi wird's mer also sicher nie langwiilig!!
Näbed de Pfadi bin ich d'Simone Waibel, 24 Jährli alt und Primarlehrerin.
Im Moment (vom September '11 bis März '12) bin ich im Usland am umereise und chan mich drum nume beschränkt um Pfadi-Agelgeheite kümmere - aber für alli wichtige Frage sind die andere Leiterinne sicher stets parat! =)
Ich bin d'Miaja, im Jahr 1985 gebore. Ich bin scho me als mis halbe Läbe i dä Pfadi. Sit em Summer 2008 bini Abteiligsleiterin. 1994 hani i dä Biendli agfange, bin dänn gli äs Pfadisli worde und han dänn i dä Sek, als GF mini Leiterkarriere agfange. Sit Afang 2010 leit ich mit dä Riparia und dä Zarpa d'Fünkli Wunibald. Äs isch immer wieder ä Freud am Samstignammitag strahlendi Chindergsichter z'gseh.
I mim suschtige Läbe, heiss ich Natalie Schumacher und schaffe als Dekorateurin im Depotinterio da z'Winterthur, was mer grosse Spass macht.
I dä Pfadi kännt mer mich als Zarpa. Ich bin sit em 94i bim Escheberg debi. Agfange leite hani mit 14i als Gf bi dä Wabe Rose, bin dänn nach öppe drü Jahr Volkleitern vom Volk Lotos worde. Im Summer 08 hani s’Volk abgäh und han zämme mit dä Miaja und dä Sty s’Amt als AL übernoh, zudem leite ich no bi dä Fünkli Wunibald. Au nach so langer Ziit macht mer Pfadi immer no uhh Spass.
I mim "Nöd-Pfadi-Läbe" heiss ich Nicole Schumacher, bin im Jahr 1987 gebore und schaffe als Medizinischi Praxisassistentin.