Leiterinnen

D'Pfadilüüt känned mich als Styra oder oftmals nänneds mich au eifach nur Sty. Mini Pfadilaufbahn hät erscht i de 6. Klass agfange. Aber sit deet häts mich packt und ich chume nüme los devo. G'leited hani für 5 Jahr bis im Summer '06 im Trupp Habsburg.
Nach ere churze Pfadipause hani mit andere zäme d'Fünkli Hotzeplotz in Elsau uf d'Bei gstellt. Sit em Summer '07 bin ich jetzt det begeischtered am leite. Es Jahr später hani zäme mit de Miaja und de Zarpa au na s'AL-Amt überno. Usserdem engagier ich mich immer wider für s'eint oder s'ander Projektli i de Pfadiregion Winti. I de Pfadi wird's mer also sicher nie langwiilig!!

Näbed de Pfadi bin ich d'Simone Waibel, 24 Jährli alt und Primarlehrerin.

Im Moment (vom September '11 bis März '12) bin ich im Usland am umereise und chan mich drum nume beschränkt um Pfadi-Agelgeheite kümmere - aber für alli wichtige Frage sind die andere Leiterinne sicher stets parat! =)

I dä Pfadi kännt mer mich als Zarpa. Ich bin sit em 94i bim Escheberg debi. Agfange leite hani mit 14i als Gf bi dä Wabe Rose, bin dänn nach öppe drü Jahr Volkleitern vom Volk Lotos worde. Im Summer 08 hani s’Volk abgäh und han zämme mit dä Miaja und dä Sty s’Amt als AL übernoh, zudem leite ich no bi dä Fünkli Wunibald. Au nach so langer Ziit macht mer Pfadi immer no uhh Spass.
I mim "Nöd-Pfadi-Läbe" heiss ich Nicole Schumacher, bin im Jahr 1987 gebore und schaffe als Medizinischi Praxisassistentin.

Ich bin dBalaja und bin sit em 2005 i de Pfadi. Nachdem ich es paar Jahr im Trupp Mörsburg gleitet han, bin ich denn zu de Bienli cho und leite sit letschtem Summer zäme mit de Tenera s'Volk Lotos.

Näbet de Pfadi heiss ich Martina Keller und bin im 91i gebore. I minere Freiziit schpiel ich Klavier, tuen gärn singe und läse, verusse sii und mit Fründe öppis mache. Und natürlich gang ich sehr gern i Pfadi! Vor eme Jahr han ich am Rychenberg d'Matur gmacht und bin nachher es halbs Jahr z'England gsi als Aupair, han es Praktikum gmacht und bin mit em Zug dur Osteuropa greist.
Im Herbst 11 fang ich a de Uni z'Züri a Germanistik studiere.

Hallo ich bi d'Jiminy und bin sitem Früehlig'06 ide Pfadi!Ich bin uf dä Pfadiname Jiminy tauft worde, wil ich so fröhlich, offe, ehrlich und hilfbereit seg, wie d'Grille vom Pinocchio, wo dä glich Name het wie ich.Bis vor de Summerferie'09 bin ich bide Gruppe Adler Chnopf gsi. Und sitem Summer'09 bin ich Leiterin im Volk Lotos. Bis im Winter'10 han ich ide Wabe Lilie gleitet und jetzt leit ich mit de Bantje und de Alea d'Wabe Rose, was ich sehr lässig find!:)                                                                     Usserhalb vo dä Pfadi kennt mer mich als Pascale Müller und ich bin im April'96 uf d'Wält cho. Ich bin jetzt ide 3.Sek im Schuelhuus Mattebach und gang nach de Summerferie id Kantonsschuel im Lee. I minere Freiziit, bin ich gern dusse, singe sehr gern, lache, mach gern öppis mit Früünde und natürlich gang ich id Pfadi was ich au usgsproche gern mach!

Min Name isch Happy, usserhalb vo dä Pfadi nännt mer mich Miriam Hobi. Ich bin ich 20 Jöhrli jung und han im Summer 09 mini 3-jährig Lehr als Fachfrau Information- und Dokumentation mit BMS abgschlosse. Momentan mach ich äs Praktikum im Waldchindergarte zWitikon. Danach möcht ich den gern Chindergärtnerin studiere.
I dä Pfadi bin ich bereits sit em 98 und sit em 05 bin ich Leiterin im Volk Akelei. Im Volk bin ich zueständig für d'Abmäldige, dä Elterkontakt und für diversi administrativi Sache.
Näb dä bin ich so guet wie a jedem Match vo Pfadi Winterthur Handball ahzträffe, lies sehr gern äs guets Buech und gang gern is Theater oder i Fottimuseene. Im Winter stahni au no liideschaftlich gern uf em Snowboard.

Ich bin d Falena und scho sit em 98i i de Pfadi. Agfange hani i de Biendli und nachher bini Chnopf gsi i de Gruppe Adler. Als Leiterin hani i 06 i de Gruppe Loi agfange und nach 4 super Jahr det hani denn zäme mit de Strega und de Mijuchu dTruppleitig überno!
Usserhalb vo de Pfadi heiss ich Salome Gastberger und bi 1990 gebore. I ha jetzt im Summer 10 mini Matur a de Kantonsschuel Büelrain gmacht und wird vorussichtlich imne Jahr afange Medizin zstudiere. Aber zerscht wird ich i mim Zwüschejahr chli schaffe imne Treuhandbüro und nachher no go reise, aber sicher nebedra au wiiterhin mit voller Energie i de Pfadi debi si!

Sali zeme. Ich bin d Yedra, im richtige Lebe heiss ich Carina Brossi und bin 17ni. Sit däm Summer mach ich e Lehr als Kauffrau bi dä AXA Winterthur. Ich leite d Gruppe Adler sit 3 Jahr und neu ez au mit dä Milou, Maimu, Tuuli und Lovis. 

Nebst dä Pfadi tuen ich gern Choche, spile inere Band und mache gern mit mine Kollege öpis.

Freu mich uf wiiteri Pfadijahr. :)

Hoi, i de Pfadi heiss ich Oribi und suscht Nehir Schmid. Sit de Herbstferie 2007 leit ich mit de Falena und de Balaja d Gruppe Leu.
Ich gang i di 2. Klass am Rychenberg und ussert de Pfadi duen ich au no gern chlettere und Harfe spile.

Ich bin d'Soraya Gasser und 14i. I de Pfadi säged mer alli Feliz (das bedütet"fröhlich" uf Spanisch). Ich gahne i di 2.Klass am Gymi Rycheberg. Ussert dä Pfadi tuen ich gärn riite oder triff mich mit Fründe. I de Pfadi bin ich siit ich 6i bin, im Winter09/10 han ich bi de Gruppe  Loi agfange leite.

Hallo zäme!

Ich heisse Katja Bächli, bin 14i und gange i die 2. Sek im Schuelhus St.Georgen. I de Pfadi seged mir aber alli Orenda (magischi Chraft uf indianisch). Ich bin siit etz denn 3 e halb Jahr debii und es isch immerno vool cool. Siit em letschte Winter tuen ich mit de Sneschinka, de Feliz und de Skimara i de Gruppe Loi leite. Das macht mir mega Spass. Nebed de Pfadi tuen ich i minere Freiziit gern schwümme, lese, Musik lose und mit mine Kolleginne Sache underneh.